Síðasti dagur Póllandsferðar

Jæja núna er síðasti heili dagurinn okkar hér í Varsjá að kvöldi kominn. Á morgun verður haldið heim en við eigum pantað beint flug frá Varsjá til Keflavíkur með Iceland Express. Lagt verður af stað kl. 21:30 og verðum við því lent um miðnætti að íslenskum tíma.

Við hittum Birki ekki í dag eins og til hafði staðið þar sem hópurinn var svo þreyttur að ákveðið var að vera um kyrrt þar sem þau gista og hvíla sig. Við eigum von á að heyra frá þjálfaranum hans um nákvæma tímasetningu úrslitakeppninnar og vonum við að a.m.k. önnur hvor greinin verði á morgun þannig að við náum að sjá hann.

Annars byrjaði dagurinn á því að við sváfum lengur. Þegar við vorum orðin nægjanlega hvíld ákváðum við að gerast menningarleg og skoðuðum safn sem heitir á ensku Warszawa rising. Safnið snýst að mestu leyti um nokkra daga í ágúst 1944 þegar íbúar Varsjár gerðu uppreisn gegn þjóðverjum en einnig er á safninu fjölmargir munir úr seinna stríði og frá tíma kalda stríðsins. Mjög flott og áhrifamikið safn.

Eftir safnið var púlsinn tekinn á einni af verslunarmiðstöðvum Varsjár. Við vorum margoft búin að ganga framhjá þessu risastóra húsi án þess að hafa hugmynd um að í því leyndust þessar fínu búðir, alveg ótrúlegt. Við rákum aðeins inn nefið og kíktum á búðirnar og þar fannst þessi glæsilegi jakki á Eið sem ákveðið hafði verið að fjárfesta í. Á heimleið upp á hótel stoppuðum við á ítölskum stað til að borða en kvöldinu var síðan eytt í að horfa á heimabíó hótelsins og var kvikmyndin Shutter Island fyrir valinu.

Á morgun verður ferðinni vonandi heitið til að sjá hetjuna okkar keppa og sennilega verður einhverjum tíma eytt í verslanir og kvöldmatur snæddur áður en haldið verður út á flugvöll.

Annars er þessi ferð búin að vera mjög skemmtileg og það er alveg óhætt að mæla með ferð til Varsjá. Varsjá er ekki fallegasta borgin sem við höfum komið til (enda er 80% af henni byggð á síðustu 60 árum) en hér er margt að skoða, góða veitingastaði er að finna á hverju horni og verðlag er hagstætt, meira segja fyrir gengispínda íslendinga.

Bestu kveðjur frá Warzsawa
Íris og Eiður

Athugasemdir

[Maja (IP-tala skráð) 21.9.2010 kl. 09:20]

Góðan og blessaðan daginn min kæru.

Takk fyrir bloggið Iris mín, alltaf jafn gaman að fá ferðafréttir. Vonandi fáið þið að fylgjast aðeins með Birki í dag. Það verður gaman að heyra í honum þegar keppnin er afstaðin og allir komnir heim. Á heimaslóðum er annars allt í friði og spekt. Sambúð katta, barna og amma ljúf og skemmtileg. Kettlingar fjörugir, afar lystugir og verulega áhugasamir um prjóna og garn sem ömmur föndra með.

Vonandi gengur heimferð og annað sem er á dagskránni samkvæmt áætlun.

Við hlökkum til að sjá ykkur.